الرائد نت
مجلة الرائدمنوعاتنبض العراققصة قصيرة .. فلوجي في الشعلة
3029101672014_76

قصة قصيرة .. فلوجي في الشعلة

– أخوية تاخذنه للشعلة

– تفضلوا

وقبل ان يصعد الرجل الاربعيني وعائلته وضع حقيبتا سفر متوسطة الحجم في صندوق السيارة . كانت معه زوجته وبنتان توأم وولد صغير بيده كرة .

الاب يتصرف بعصبية مع عائلته ، وكان يبدو عليه الانزعاج . وسأل زوجته بحدة :

– للمرة الأخيرة أسألچ إنتِ متأكدة انه الأمور طبيعية وماكو ضرر .

– طبعا ابو مروان .

– كتلج لاتكولين ابو مروان ، سميني ابو ليلى ، على اسم بنتچ الچبيرة .

– انت ليش قلق ، والله ماكو شي .

وأخذني الفضول ، فسألت الرجل .

– خوماكو شي .

– بصراحة احنة مهجرين من الفلوجة جينا بقدرة الله ، ماعدنة احد ببغداد بس بيت عديلي واتصلوا بينة يعرضون علينة نجي عندهم ، واني قلق على عائلتي لأن ما اعرف المنطقة ، وانته تعرف ولد الحرام بهذلوا بلدنا بين سنة وشيعة .

– اخوية ماكو داعي للقلق .

– مداتسمعها تكولي ابو مروان .

– وشنو يعني هو اسم مثل باقي الاسماء .

– شلون شنو يعني الله يخليك ، بلدنا صاير هرج مرج ، واني ما اعرف عديلي زين ، لقاءاتنا معدودة .

فقالت زوجته :

– يا ابو مروان ، العفو قصدي ابو ليلى ،، هُوَ ابو علي زوج اختي بنفسه خابرك وعرض علينا نكعد يمهم واختي فرغت لنا غرفتين . قابل نبات بالشارع .

وظل ابو مروان قلقا وعصبياً طوال الطريق ، وهو يوصي بناته ان لايخرجوا من البيت ، وان يمنعوا مروان من الخروج للشارع ولعب الكرة وانا احاول تهدئة مخاوفه . وهو يقول في كل حين :

شلون مصيبة هذي !!

وصلنا الشعلة ، ووجدنا بيت ابو علي امام بيتهم ، يتقدمهم ابو علي وزوجته وولده علي الذي يماثل سن مروان وثلاث بنات صغيرات .

راحت القبلات تصدح على الخدود بين الجميع ، والجيران وقفوا أمام بيوتهم لينظروا للضيوف القادمين من الفلوجة وهم يهنأونهم بالسلامة من بعيد . والكل يصيح بالتناوب :

الحمد على السلامة ام مروان ، الحمد على السلامة ابو مروان ، وام مروان تبادلهم التحية بينما ابو مروان غاضب ويرد التحية بصوت منخفض .

قال لي ابو مروان بينما اساعده كي يخرج الحقائب من صندوق السيارة :

– الظاهر كل الجيران يعرفون بينة ، أهل الشعلة كلهم يعرفون الولد إسمه مروان شلون مصيبة هذي !!

وفجاة راح مروان وعلي يركضون لاعبين في الشارع والكرة بين اقدامهم وقد ابتعدوا .

فجأة صاح الرجل الفلوجي ينادي إبنه بأعلى صوته :

مروان .. مروان

 

اترك رد

فيديو

مؤسسة الرائد الثقافية

الرائد نت
موسوعة إليكترونيّة شاملة ومحدّثة بطريقة تغني الزائر بكافة المعلومات المرتبطة بالواقع العراقي

تواصل معنا

تواصل مع مؤسسة الرائد الثقافية

العراق - بغداد

+9647801988624 +9647707596529

info@alraeed.net

العودة الى الاعلى